في كل مرة تقرأ هذي مواضيع الأجهزة الجديدة وتبدأ معها التخيلات الفضائية لشكل الجهاز سواء يكون بلايستيشن 5 أو إكسبوكس الجديد ونشوفها كأنها أجهزة تنزل في 2070! وشكل الأفلام حاست روسنا وبالنهاية نشوف تصميم أجهزة عادية مستطيل بسيط وفيه كم زر.
بحاول أنه الي أقوله هنا مايكون شيء فضائي ولكن توقعات بناء على اشياء عشتها وقريتها عن أجهزة الجيل الجديد الجاية بلايستيشن 5 والإكسبوكس الجديد.
خاصية اللمس:
مثل أجهزة الجوال والتابلت, ممكن يكون فيه بيد التحكم والجهاز نفسه أشياء تقدر تتفاعل معها باللمس. ومو شرط يكون الجهاز كله لمس, يعني يصير فيه بعض المميزات الي تقدر تتحكم فيها وتكون تشتغل على بطارية. مثل أنك تغير إعدادات الجهاز أو تتصفح الرسائل بدون ما تشغل الجهاز وممكن يكون هالشيء بالجزء العلوي لغطاء الجهاز (شاشة لمس علوية).
وحتى يد التحكم ممكن يكون فيها شيء خاص باللمس والي يمكن يفتح فرص جديدة للمطورين أنهم يطورون ألعاب صغيرة مثل الجوال تعتمد 100% على اللمس.
بروجكتر داخلي:
قريبا نسبة كبيرة من الي عندهم أجهزة بلايستيشن وإكسبوكس عندهم شاشة مسطحة ولكن مو كلهم عندهم نفس الجودة, لذلك ممكن الشركات تنزل إصدارات معينة من الأجهزة الجديدة يكون معها بروجكتر بحيث تقدر تشيل جهازك وتلعب فيه بأي مكان. يعني مثلا تخيل أنت بالاستراحة وعندك جدا أبيض كبير فاضي تقدر تحط الجهاز هناك وتشغل البروجكتر وتشوف صورة أوضح وأكبر من شاشتك وبدقة 4K.
(على فكرة, فيه بروجكتر خاص للبلايستيشن الحين يباع منفصل بحجم أيديك وتحطه بجيبك إذا خلصت!)
معالجات سحابية “Cloud”:
هذي معناتها أن الجهاز ما يتعمد على المعالج داخل الجهاز علشان يشغل لعبة, فيصير يعتمد على معالج أونلاين وسيرفرات الشركة نفسها عن طريق الانترنت وهذا الشيء بيعطي الجهاز والألعاب إمكانيات مالها حدود أبدا. يعني بتشوف كل 100% يتفاعل معك باللعبة بدون ما نقول أن معالج الجهاز ما يتحمل يسوي كل شيء بوقت واحد.
ومثال عليه لعبة كراك دوان للإكسبوكس والي استعرضتها مايكروسوفت لنا بالفيديو فوق.
نظارات الواقع الافتراضي:
ممكن هالشيء يفشل مثل ما فشلت تقنية 3D ولكن هالمرة بنكون داخل عالم اللعبة فعلا وهناك فيديوهات وتجارب أولية أثبتت نسبة نجاح هذي التقنية. ولعل مطوري الألعاب سيضعون خيار إضافي بكل ألعابهم إنك تلعبها بالنظارات أو على الشاشة ويبقى التطبيق هو الأساس.
ولا يحتاج إنك تكون واقف على رجليك, بل أنه وأنت جالس على الكنب وتلعب ولابس النظارة ويد التحكم وتلعب طبيعي لكنك داخل جو مع المنظر والصوت. وبتكون حتى أوفر إنك تشتري شاشة بجودة عالية ومسرح محيطي.. لكن لا تلعب وخويك لاصق فيك وتجيب العيد وتخبط فيه
تشغيل ألعاب الأجهزة السابقة:
هذا الخيار بيكون مهم جدا للشركات الثلاث سواء سوني أو مايكروسوفت أو نينتدو. لانه تخيل أحد الشركات تطبق هذي الميزة ونقول مثلا مايكروسوفت وأن جهازها الجديد بيشغل ألعاب Xbox, Xbox 360, Xbox one ومن اليوم الأول لإطلاق الجهاز الجديد! تخيل هذا الشيء ولعله يكون الآن أحد أهم مطالب اللاعبين بالوقت الحالي بما أنه عندهم كل شيء تقريبا من خدمات أونلاين وألعاب جديدة.
أما كيف تطبقها؟ فهذا يحتمل خيارات كثيرة منها اشتراك شهري أو سنوي ويكون بنظام (اضغط على اللعبة لتبدأ مباشرة) يعني خدمة Streaming تتطلب فقط اتصال انترنت مناسب وبهذا ما تحتاج تحمل اللعبة أبدا.
0 التعليقات:
إرسال تعليق